The Question is

Abd-Alrahman Hussien
Abd-Alrahman Hussien
PFP Alumni | Program Manager @ Uipath | Delivery Management | Tech, AI & Automation | Leader Who Gets Things Done | Calming the Storm, Delivering Results.
تاريخ النشر ١٩ مايو ٢٠١٩
+ متابعة

"هو أنا إزاي أحدد أنا عاوز إيه في حياتي؟ أو إزاي أوصل لل أنا فعلاً عاوز أكمل فيه؟ وأعمل إيه لو عرفته علشان أبقى حاجة؟" اكتر سؤال ملهوش إجابة محددة، وأختلف عليه ناس كتير ودايما كل واحد بيطلع برأي، ومحدش بقى فاهم هو عاوز إيه؟ ولا يعمل إيه علشان يعرفه؟ وهل هي حاجة فطرية ولا حاجة هتكتشفها بالصدفة؟

الفكرة أن الموضوع نسبي وبيختلف حسب كل شخص، وحسب هو عنده استعداد يعمل ايه؟ بس في شوية نقط مهمة لازم تتعرف:

-كاتب قديم قال في كتاب له علاقة بالتربية ومرحلة السن الصغير، قال إن الطفل وهو صغير عارف هو عاوز إيه؟ ومن جواه ميال لحاجة معينة" أنا نفسي وانا صغير كنت بأميل للكتب حتى لو كتب المدرسة وكنت أقعد اقرأها بصوت عالي" المهم.. الكاتب وضح أن كل ما الطفل يكبر، ويبتدي يواجه الواقع، يحتك بالناس والمدرسة والعالم الجديد ده، ويطّلع ويشوف.. بيبقى مش عارف يقرر أو يختار، أو يتأثر بالاهل ورغبتهم.. فواحدة واحدة يبتدي يحيد عن ال هو كان ميال له ومايشفهوش ويتوه في الدوامة. فمش شرط أن ال أنت عليه دلوقتي أو ال بتعمله يكون هو هدفك الحقيقي ال هتكمل في لأخر عمرك.. وارد هدفك يكون في تراك تاني وممكن تلاقيه بعدين.. كل حاجة بتتغير.. متستغربش.(طبعا الكلام ده لا ينطبق على كل الناس.. مفيش حاجة مطلقة)

-مش شرط أنك تبقى عارف عاوز إيه من البداية خالص، نسبة قليلة جدًا من الناس ال بتبقى عارفه عاوزه إيه فعلاً من غير ما تجرب أو تدخل في سكك كتير وتتراجع، لأ هي محددة جدآ.. ودول فعلاً مش كتير. فمش شرط، لأنه ناس كتير بتدخل وتجرب سكك كتير ومجالات أكتر، ومن مجال لمجال كل شوية.. الفكرة أنه لسه ملاقش ال هو عاوزه فعلاً وإيه المناسب له وال هيريحه، وعنده استعداد يقضي عمره فيه.. فلازم تعرف أنه وارد جدًا أنك تجرب حاجات كتير ومترتاحش.. ممكن توصل ال عاوزه وممكن لأ.. الموضوع متوقف عليك.

مش معنى أنك عرفت إيه ال أنت عاوزه أنك تسيب كل حاجة وترميها ورا ضهرك وتجري وراه، وتعمل زي مدعي ال Life Coaching ال يقولولك امشي ورا شغفك، روح لل بتحبه، متضيعش عمرك، وشوية الحماس المؤقت ال بيعجب كتير من الناس ال بسببه ممكن حد يضر نفسه؟ طب إزاي! هقولك.. كل الكلام ده حلو وجميل، وممكن يجيب نتيجة مع واحد بس هو مش قاعدة، لأنه كلام عايم مفتوح وطالع من شخص بيحكم بخبرته هو وبس، مش وضع غيره.. لأن غيره ممكن أوي مينفعش يعمل زيه، وضعه مختلف، ظروفه مش زيه.. صورة النجاح النهائية مش هي الحقيقة.. ورا الكواليس في مليون حاجة مختلفة حسب كل شخص.. وعمرها ما هتبقى شبه غيرها.. فلو حصل معاك حاجة زي كده، لازم تفكر بعقل؟ متنجرفش ورا الكلام ال زي ده، شوف وضعك، حدد أولوياتك، إيه ينفع تعمله؟ وازاي وامتى.. كله حسب اولوياتك.. فكر بعقلك، وازن حياتك، وشوف إيه الأنسب لك، وشوف أنت محتاج إيه.. متتسرعش.

-طب أنا دلوقتي عرفت عاوز إيه.. المفروض أعمل إيه بقى؟ هقولك.. المفروض تدور على حد بيفهم في التراك ده وتسأله عن ال أنت عاوزه، وكل ما يخصه، تجمع معلومات عنه، وتبقى مُلم به وتعرف دنيته، وتشوف ال نجح فيه عمل إيه وتقتدي به، بس متقلدش ولا تفكر تبقى زيه.. مستحيل. ولا تقارن نفسك به مهما كان لأن كل واحد وله حياته ووضعه.. مع ده لازم تحاول تبتدي بخطوات مش شرط كبيرة، لأ واحدة واحدة، خطوات بسيطة.. زي ما ستيف جوبز قال.. خطوات بسيطة هتؤدي لنتيجة مع الوقت.. لكن عدم وجود أي خطوة وأنك تستنى معجزة تحصل مش هيؤدي لأي حاجة خالص وهتفضل مكانك، فلازم تبدأ، مفيش حاجة هتجيلك طول ما أنت واقف.. اتحرك

-لو أنت من الطبقة المتوسطة، وهدفك مش مُجدي ماديًا وبعيد عن سوق العمل وشغل الموظفين.. ومعندكش رفاهية الإستقالة وإنك تبتدي في طريق معين، متأخدش ال Risk وتستقيل.. حاول توازن بين شغلك وتكفي احتياجاتك، وبين هدف بتسعى له.. متخاطرش بكل حاجة.. هتخسر.. وافتكر أن الحياة أولويات.

-في ناس كل ما تشوف حد ناجح عاوزه تبقى زيه، وتأخد سكته وطريقه، ده أكبر غلط، متعودش نفسك على كده، مقياس النجاح مختلف، وأنت مش هتقدر تعمل كل حاجة في نفس الوقت، مستحيل، ولا ينفع كل ما تشوف حد عاوز تبقى زيه، إينعم في ناس بتقدر تعمل أكتر من حاجة وتنجح فيهم، بس دي مش قاعدة.

-لازم يبقى عندك حاجة أنت شاطر فيها.. أنت بتعرف تعمل ايه؟ موهبة أو مهارة معينة اكتسبتها.. اشتغل على نفسك فيها وابتدي خد خطوات أنك تبقى حاجة وتنجح فيها.. بس متستعجلش.

-مش عيب أنك تفشل في تراك أو مجال معين، ولا عيب أنه يتقال عليك متنفعش في الشغلانة(محدش بيعمل كل حاجة) غيرك ال شاطر في مجال معين لو حطيته في تراك تاني هيبقى مش فاهم حاجة. ووقتها يا إما محتاج تطور نفسك أو الطريق مش بتاعك وفي الحالتين أنت مش خسران ولا في أي حاجة تعيبك.

متستعجلش أنك مش بتشوف نتيجة كبيرة، ولا تفكر نفسك هتكون جامد من البداية، بس الاستمرار هيخليك تتقدم"انا كتاباتي من سنة غير كتاباتي دلوقتي" دي الفكرة.. متستعجلش.. الاستمرار أهم حاجة، الفكرة في الممارسة.

-مفيش حاجة هتيجي من أول مرة لازم تخسر الأول، ومتفتكرش أن أول طلعة هي الخلاصة وأنك بها هتوصل.. ممكن ده يحصل مع ناس بس الأغلب أنك لازم تخسر، تغلط وتتعلم، تجرب حاجات كتير لحد ما تعرف عاوز إيه؟ ولحد ما تعرف تعمله صح.. ومحدش هيقولك تعمل إيه؟ ولا ينفع تسمع لحد من Motivation Speakers يقولك هعلمك تختار واقولك تنفع تبقى إيه؟ مش حقيقي.. الصح يقولك الخطوط العريضة، مميزات وعيوب، يحكي خبرته وإيه الأساسيات، محدش هيقدر يقولك أنت تنفع في إيه، دي بتاعتك أنت، ومفيش حاجة إسمها أي حاجة، لازم تحدد، تجرب وتروح وتيجي، وتتعرض بنفسك لل بيحصل.. لحد ما أنت تقرر وتفهم صح.

في طريقك متاخدش كل حاجة أنها شيء مُسلم به، ولا تصدق كل حاجة، حكم عقلك، فكر في كل شيء بتتعرضله، واحكم بنفسك، شوف يتناسب معاك ولا لأ، وحط في الإعتبار أن مفيش حاجة صح دائما أو خطا دائما.. الاختلاف سنة الحياة.

أهم نقطة، ربنا بيجازي على السعي، مش الموهبة، ولازم تحاول صح، وترضى دائما بنصيبك، وتتعلم من كل حاجة، تسيب كل حاجة على ربنا، وطول ما بتسعى هتنال في الوقت المناسب.. (على المرء أن يسعى وليس عليه إدراك النجاح). سيب الناس في حالها، محدش كامل، كل واحد وأخد رزقه بشكل مختلف ومحدش عنده كل حاجة، كلنا ماشين في طريق كله صراع بس مختلف عن ال ماشي جمبك. حاول.. واعمل ال عليك، حدد أنت عاوز إيه.. خليك مرن، توقع أنك ممكن تغير كل خططك وكل ال أنت عاوزه في أي وقت، عادي جداً أنت حر ودي حياتك، أهم حاجة أنك تسعى ومتزهقش.

لحمة بالجبنة الشيدر

اومليت بالجبنة القريش